शीतलहरबाट सप्तरीमा मृत्यु हुनेको संख्या ७ पुग्यो

राजविराज, २३ पुस । विगत एक सातायताको शीतलहरका कारण सप्तरीमा मृत्यु हुनेको संख्या ७ जना पुगेको छ । जाडोले शनिवार थप एक जनाको मृत्यु भएपछि मृतकको संख्या ७ पुगेको हो । जिल्लाको तिलाठी कोईलाडी गाउँपालिका–२ लौनियाँका ५५ वर्षिय सुजान ठाकुरको जाडोका कारण मृत्यु भएको छ । यसअघि महदेवा गाँउपालिका २ का ५८ वर्षीय सुकदेव यादव, राजविराज नगरपालिका २ का ६० वर्षिया नाजो बेगम र १० का ६५ वर्षिया कैलीदेवी खंग, छिन्नमस्ता गाउँपालिका १ का ३५ वर्षीय रामदयाल राम, ३६ वर्षीय कुलदीप राय र ७२ वर्षीया रजियादेवी रायको जाडोका कारण मृत्यु भएको थियो ।
जाडो कारण जनजीवन कष्टकर हुन थालेपछि सप्तरीका सामुदायिक विद्यालयहरुमा २६ गतेसम्मका लागि विदा दिएको छ । जिल्ला शिक्षा कार्यालयको निर्णयअनुसार जिल्लाको ४१२ वटै समूदायिक विद्यालयहरुमा २६ गतेसम्मका लागि विदा दिएको हो ।
यसअघि, कार्यालयले विहिवार र शुक्रवारसम्म विदा दिएको थियो । तर, मौसममा सुधार नआएपछि थप ५ विद्यालयहरु बन्द गर्ने निर्णय गरिएको नेपाल शिक्षक महासंघ सप्तरीका अध्यक्ष फुलेश्वर मण्डलले जानकारी दिएका छन् ।