संविधान कायार्न्वयन गर्न नसकेर समाप्त पार्ने खतरा छः महन्थ ठाकुर

जनकपुर,  माघ । राष्ट्रीय सभा सदस्यमा प्रदेश नम्बर २ बाट निर्विरोध निर्वाचित सदस्यहरुलाई एक समारोहका बीच निर्वाचन आयोग धनुषा कार्यालयले प्रमाण पत्र वितरण गरे । प्रदेश नम्बर २ बाट राजपाका वृषेशचन्द्र लाल र रमेश यादव, संघीय समाजवादी फोरम नेपालका प्रमिला यादव र रामपृत पासवान,नेपाली कांग्रेसका जितेन्द्र देव र मुक्ता यादव र एमालेका सुमन प्याकुरेल र माओवादी केन्द्र का शशिकला दाहाल निर्विरोध निर्वाचित भएका थिए ।

मो. अख्तरले उम्मेदवारी फिर्ता लिएपछि माघ १५ गते नै उहांहरु सबै निर्विरोध निर्वाचित भएका थिए । तर प्राविधिक रुपमा त्यस दिन प्रमाणपत्र दिन नमिल्ने भएकोले आज माघ २४ गते उहाहरु सबैलाई प्रमाण पत्र वितरण गरिएको हो ।
प्रमाणपत्र वितरण भएको लगतैपछि नेता लालको घरको प्रांगनमा राजपाबाट निर्विरोध निर्वाचित लाल र रमेश यादवसंग शुभकामना आदानप्रदान गरियो । सो कार्यक्रममा बोल्दै राजपा अध्यक्ष महन्थ ठाकुरले संविधानको ३०६ धारामध्ये १८० वटा धारा संसोधन गर्नुपर्ने बताए । विभिन्न प्रदेशमा जनताबाट असुल्ने १०० प्रतिशत रकम मध्ये प्रदेशमा ८५ प्रतिशत केन्द्र सरकारमा, १० प्रतिशत प्रदेश सरकारमा १० प्रतिशत र स्थानीय सरकारमा ५ प्रतिशत रकम रहने कुरा बताउदै ७ वटै प्रदेशले यसका लागि एकजुट भै लडनुपर्ने कुरामा जोड दिए ।
उनले यो संविधान बनाउनेहरु आफैले नै विभिन्न जटिलताका कारण संविधान कायार्न्वयन गर्न नसकेर समाप्त पार्ने खतरा रहेको संकेत गर्दैै ठाकुरले थप संघर्षका लागि तयार रहनुपर्ने बताए ।
राजपा अध्यक्ष मंडलका सदस्य महेन्द्र रायले जनकपुर उपमहानगरपालिकामा राजपाले जितेको र जनकपुर राजधानी बन्ने तरखरमा रहेको भएपनि जुन सद्भाव प्रदेश सभा सदस्यहरु उपमहानगरपालिकाबाट पाउनुपर्ने हो त्यो पाउन नसकेको र यहांका होटलहरुले प्रदेश सभा सदस्य एवं राजनीतिक दलका कार्यक्रताहरुसंग ब्रह्मलुट गरेको गुनासो व्यक्त गरे । उनले जनकपुरका सडक निकै फोहर रहेको बताउदै यसतर्फ सुधार गर्न आवश्यक रहेको सचेत गराए ।
राजपा अध्यक्ष मंडलका सदस्य महेन्द्र रायले यो कुरा भनी राख्दा त्यहा जनकपुर उपमहानगरपालिकाका मेयर लाल किशोर साह, उप मेयर रिता पनि त्यही उपस्थित थिए ।  साभारः भुमिजा पोष्ट