चिसो हावा र सितलहरले तराईको जनजीवन कष्टकर

सर्लाही, १९ पुस । एक साता यता बढेको चिसो र सितलहरका कारण सर्लाही सहित तराईका अधिकांश क्षेत्रको जनजीवन अत्यन्तै कष्टकर बनेको छ । बाक्लो हुस्सु र कुहिरो लाग्ने, घाम नलाग्ने,चिसो बतास चल्ने गरेपछि तराईको जनजीवन कष्टकर भएको हो । विशेषगरी निम्न आयस्रोत भएका र विपन्न मजदुर वर्ग बढी चिसोबाट प्रभावित भएका छन् । चिसोका कारण विपन्न र गरिब परिवार दिनभरि नै आगो तापेर बस्न बाध्य भएका छन् भने किसान चिसोका कारण खेतमा काम गर्न जान नसकेको मलंगवा नगरपालिका वडा नं. १० बस्ने राकेश शर्माले बताउनुभयो । चिसो र शीतलहर बढेको हुँदा तरकारीखेती पनि प्रभावित भएको किसानले दुखेसो व्यक्त गरेका छन् । आलु गोलभेँडा लगायतका तरकारीमा डडुवा रोग लागेर तरकारी बाली नष्ट भएको चन्द्रनगर १ किसनपुरका किसान देवल महतोले जानकारी दिनुभयो । चिसोले गर्दा स्थानीय वजारहरुमा पनि मानिसहरुको चहलपहल घट्नुका साथै वृद्धवृद्धा र बालबालिका समेत चिसोका कारण प्रभावित भएका छन् । चिसोले वृद्धवृद्धामा बाथ, दम, रुघाखोकीको प्रकोप देखा परेको छ भने बालबालिकामा निमोनिया श्वासप्रश्वास लगायतका रोगीहरु उपचारका स्थानीय स्वास्थ्य क्लिनीक तथा स्वास्थ्य केन्द्रमा भीड लाग्ने गरेको सर्लाही अस्पताल मलंगवाका मेडिकल अधिकृत अभिनाश सिंहले बताउनु भयो । चिसोले स्कुले बालबालिकाको विद्यालय जाने संख्या कम भइरहेको छ भने केही विद्यालयहरुले जाडोलाई मध्यनजर गर्दै स्कल विदा समेत दिएका छन् । यस्तै बाक्लो हुस्सुकै कारण सवारी साधन चलाउन समस्या हुने गरेको, दिउसो नै हेटलाईट बालेर सवारी चलाउनु परेको हरिवन सासापुरका ट्रक चालक शम्भु न्यौपानेले बताउनु भयो । चिसोकै कारण सवारी दुर्घट्ना समेत बढेका छन् । गएको एक साताभित्र मात्रै जिल्लामा सवारी दुर्घट्नाबाट ६ जनाले ज्यान गुमाई सकेको जिल्ल ट्राफिक प्रहरी प्रमुख पाँचु चौधरीले बताउनु भयो ।