राष्ट्रियसभा निर्वाचनको मिति नतोकिएकोमा प्रधानमन्त्रीसँग एमालेको आपत्ति

२० पुस, काठमाडौं । निर्वाचनबाट सबैभन्दा ठूलो दल बनेको नेकपा एमालेले सरकारले राष्ट्रियसभा निर्वाचनको मिति नतोकेकोमा प्रधानमन्त्री समक्ष आपत्ति जनाएको छ ।

प्रधानमन्त्री शेरबहादुर देउवाले बिहीबार बोलाएको सर्वदलीय बैठकमा एमालेले नयाँ सरकार गठनमा बिलम्ब सिर्जना गर्न सरकारले जानी-जानी राष्ट्रियसभा निर्वाचनको मिति नतोकेको आरोप लगाएको हो ।

प्रधानमन्त्री निवास बालुवाटारमा भएको बैठकमा एमाले नेताहरुले राष्ट्रियसभा निर्वाचन माघ २५ मा गर्ने भन्ने हल्ला सत्य हो भने त्यो ठीक नहुने बताए । राष्ट्रियसभा निर्वाचन १०/१५ दिनभित्र गर्न सकिने दाबी एमाले नेताहरुको थियो ।

प्रधानमन्त्री देउवाले निर्वाचन आयोगसँग छलफल गरेर तत्कालै मिति तोक्ने भन्दै यसमा बिलम्ब नगर्ने जवाफ दिए । तर, एमाले नेताहरुले भने सरकारका गतिबिधि सत्ता लम्ब्याउनेतर्फ केन्दि्रत भएको भन्दै आपत्ति जनाएका थिए ।

बैठकमा सहभागी एमाले उपमहासचिव विष्णु पौडेलले भने, ‘सरकारले राष्ट्रियसभा निर्वाचनको मिति नतोकेकामा हामीले आपत्ति जनायौं । नयाँ सरकार गठनको प्रक्रिया बिलम्ब हुने गरी सरकारका गतिबिधि भइरहेकोमा हामीले गम्भीर आपत्ति व्यक्त गरेका छौं ।’

बैठकमा एमाले नेताहरुले कामचलाउ सरकारले नयाँ सरकार गठन प्रक्रिया अघि बढाउनेभन्दा पनि नियुक्ति सरुवा बढुवा र राज्यकोषबाट करोडौं रुपैया सत्ताधारीलाई बाँड्ने काम गरेको आरोप लगाएका थिए । देउवाले आफूले त्यसो नगरेको जवाफ दिएपछि आफूहरुले खानेपानी संस्थानको जिएम र पछिल्ला राजनीतिक नियुक्तिबारे प्रश्न उठाएको एमाले नेता अग्नि खरेलले बताए ।