शीतलहरका कारण तराईका अधिकांश जिल्लाको जनजीवन कष्टकर

काठमाडौं, ४ मंसिर । पाँच दिनदेखि निरन्तर रुपमा चलेको शीतलहरले तराईका जिल्लाको जनजीवन प्रभावित बनेको छ । बाक्लो हुस्सु र शीतलहरका कारण चिसो अत्याधिक मात्रामा बढेपछि विपन्न परिवार समस्यामा परेका छन् ।

सुकुम्बासी, दलित र विपन्न परिवार भने चिसोले कठ्याङ्ग्रिएर बसेका छन् । उनीहरु कहिँकत्तैबाट न्यानो कपडा पाइन्छ कि भन्ने आशमा बसिरहेका छन् । गएको शुक्रबारदेखि मौसम बदलीभई यसक्षेत्रमा चिसो बढेको हो । चिसोबढे पछि बजारमा मानिसको चहल पहल घटेको छ भने स्थानीय वाषिन्दा चौक चौतारा, बाटोघाटोमा आगो तापेर बसेका छन् ।

चिसोका कारण निजी तथा सरकारी स्वास्थ्य संस्थामा निमोनिया, रुघाखोकी जस्ता रोगका बिरामी बढेका छन् । यस्तो मौसममा तातो र झोलिलो खानेकुरा खान स्वास्थ्यकर्मीले सुझाव दिएका छन् । अत्यावश्यक काम बाहेक घर बाहिर ननिस्कन चिकित्सकको सुझाव छ । चिसो बढेपछि बजारमा न्यानो कपडाको व्यापार भने बढेको छ ।