मधेश आन्दोलनका सहिद परिवारलाई ‘५० लाख’

जलेश्वर ।राष्ट्रिय जनता पार्टी(राजपा)नेपालले मधेश आन्दोलनका सहिदहरुको परिवारलाई ५०–५० लाख दिने घोषणा गरेको छ ।राजपाले बिहिबार महोत्तरी जिल्लाको जलेश्वरमा घोषणा पत्र सार्वजनिक गरेको छ ।

‘ प्रदेश नम्बर २ मा राजपा–फोरम गठबन्धनको सरकार बन्छ ’ घोषणा पत्र सार्वजनिक समारोहमा बोल्दै राजपा अध्यक्ष मण्डलका सदस्य राजेन्द्र महतोले भने,‘ मधेश सरकारले सहिद परिवारलाई ५० लाख रुपैया उपलब्ध गराउने छ ।

मधेश आन्दोलन जारी रहेको बेला तत्कालिन संयुक्त लोकतान्त्रिक मधेशी मोर्चाले सहिदको परिवारलाई ५० लाख दिने निर्णय गरेको थियो । मोर्चाको उक्त निर्णयलाई आन्दोलनमा हिंसा भड्काउन गरिएको निर्णय भन्दै ब्यापक आलोचना गरिएको थियो । सरकारले मधेश आन्दोलनका सहिद परिवारलाई १० लाख दिएको छ ।

नेता महतोले सहिद परिवारलाई ५० लाख दिने घोषणा गरेपनि उक्त राशी बारे घोषणा पत्रमा केहि उल्लेख छैन् । तर अध्यक्ष मण्डलका सदस्य महतोले भने ,   ‘  दुई नम्बर प्रदेशमा आफ्नो सरकार बन्ने निश्चित भएको र प्रादेशिक सरकारद्वारा उक्त रकम उपलब्ध गराईने छ ।’

राजपा अध्यक्ष मण्डलका संयोजक महन्थ ठाकुर प्रतिनिधि सभा सदस्यको उम्मेदवार रहेको महोत्तरी जिल्लाको निर्वाचन क्षेत्र नम्बर ३ मा आयोजित घोषणा सभामा सहिद परिवारलाई प्रदेश सरकारमा जागिर, सन्तानलाई निशुल्क शिक्षा, स्वरोजगारीका लागि आवश्यक बजेट उपलब्ध गराइने जस्ता आश्वासन नेता महतोले दिए ।

१५ बुँदे घोषणा पत्रमा पहिचान, अधिकार र स्वाभिमानको संघर्षलाई निरन्तरतादिदै आन्दोलनलाई जारी राख्ने जनाएको छ ।

 बाढी पहिरोको स्थायी समाधान , हुलाकी राजमार्गलाई निरन्तरता , तराईमा सडक सञ्जाल बिस्तार, रेल सेवाको बिस्तार र लुम्बिनीलाई अन्तराष्ट्रिय बुद्धिष्ट केन्द्र बनाउने घोषणा पत्रमा उल्लेख छ ।

जनकपुरलाई अन्राष्ट्रिय पर्यटन स्थल एवं विश्व हिन्दु केन्द्र बनाउने र बीरगञ्जलाई नेपालको आर्थिक कारोबार एवं ब्यापारको प्रमुख केन्द्र, बिराटनगर, भैरहवा र नेपालगञ्ज देसको प्रमुख मेरुदण्ड र निजगढ–काठमाण्डु द्रुत मार्गको निर्माण एवं अन्तराष्ट्रिय विमान स्थल निर्माण लगायतका आश्वासनहरु घोषणा पत्रमा समेटिएको छ ।

घोषणा पत्रको प्रस्तावनामा नेपाललाई ‘बहुराष्ट्रिय’देस भन्दै एउटै राज्यमा कयौं राष्ट्र हुने गरेको प्रष्टिकरणदिदै तराई मधेशमा बसोबास गर्ने दलित, आदीबासी, जनजाती, मुस्लिम मधेशीहरुको बस्तीपनि एउटा राष्ट्र भनिएको छ ।

‘एउटा राज्य–राष्ट्रको निर्माण तब मात्र प्रारम्भ हुन्छ , जब मुलुकका सबै तह, तप्का, वर्ग, समुदाय र नागरिकले समानताको महसुस गर्छन् र राज्य निर्माणको अभिभारा समान रुपले ग्रहण गर्छ’ घोषणा पत्रमा अगाडी भनिएको छ, ‘ यसको प्रस्थान विन्दु लोकतन्त्र हो, भने यसको सबै भन्दा ठूलो चुनौती विभेद हो ।’

घोषणा पत्र सार्वजनिक सभामा महोत्तरी जिल्लामै रहेका अध्यक्ष मण्डलका सदस्य शरतसिंह भण्डारी, सर्लाहीमा रहेका महेन्द्र राय, रौतहटमा रहेका अनिल झा, सिराहामा रहेका राजकिसोर यादव सहभागि थिएनन् ।